Thursday, December 30, 2010

...................


එනවද
හිතේ උතුරන
මේ හිස් බව පුරවන්න?
එකම එක හිනාවක්
පුංචි හාදුවක්
වුනත් ඇති
......................
ඇත්තටම නම් මදි...
ඒත්
මම ඇති කර ගන්නම්

Tuesday, December 28, 2010

එනවාද බලන්නට?

නොකියනා දහක් දේ
නුඹ කියාදෙන දිනට
නොපතනා දහක් දේ
පතන්නට හැකි දිනට
හිරු සඳුත් මුණගැසෙයි
එනවාද බලන්නට?

Sunday, December 26, 2010

නොපිරෙනා සිත

හිතේ ගැඹරක
වෙලෙන කඳුලක්
කවි වෙලා නිති නුඹ නමින්
පුරා පත් ඉරු
පා කරන්නෙමි
ලය පුරා නැගී සුසුමකින්
එකවි එක එක
වැටුණු තැනකින්
අහුලගෙන යන එන දනන්
හැඩයි කිව්වත්
නොපිරෙනා සිත
තවත් ලතවෙයි නුඹ සොයන්

Tuesday, December 21, 2010

මුතුත් කඳුලකි

වෙරළ සිප සිප
හඬන රළ පෙළ
ළවැලි බිඳ බිඳ
සොරා ගෙන යති
එවැලි සඟවා
මුතුම තනවා
යළිත් වෙරළට
තිලිණ දී යති
සදා ළඟ හිඳ
වැළඳගන්නට
නොහැකි ලෝකෙක
මුතුත් කඳුලකි

Sunday, December 19, 2010

Saturday, December 18, 2010

දුරක සිට

මේ වහින මහා වැස්ස
නුවරටත් වහිනවද?
වැව් රවුමේ වාඩිවී
වැහි පොදට තෙමෙනවද?
දිලෙන එළි සේයාව
වැව් දියේ පෙනෙනවද?
දඟ සුළඟ දිව ඇවිත්
කෙහෙ අවුල් කරනවාද?
ඈත කඳු මුදුන් වල
වළා ඇස ගැටෙනවද?
තරු එළිය වගේ මතක
නිවි නිවී දිලෙනවද?

Friday, December 17, 2010

සිහිනයයි නුඹ

දෑස් අරිනට මොහොතකට පෙර
හදේ තැවරුණ සිහිනයයි නුඹ

උණුහුමත් නුඹේ සුසුම් සුවඳත්
සැබෑ ලෙස විඳි සිහිනයයි නුඹ

දෑත දිගු කර වැළඳ ගන්නට
දෑත දිග මදි සිහිනයි නුඹ

දෑස් ඇරි එක ඇසුරු සැණෙකින්
බොඳවෙලා මැකි සිහිනයයි නුඹ

Thursday, December 16, 2010

පහන් සිල

දුර ඈත කඳු හිමක
දැල්වෙමින් එළිය දෙන
කැල්ම නිති සිත නිවන
පහන් සිල නුඹයි මට
නුඹ ලොවේ අඳුර මිස
මගේ ලොවේ අඳුරු පට
බිඳින්නේ කෙලෙසකද
මගේ පුංචි පහන් සිල?

Monday, December 13, 2010

මතකයේ සැරසිලි






















සුසුමේ වෙලි වෙලි
දඟ පා සැලි සැලි
මතකයේ සැරසිලි
කිම මේ කැළඹිලි

සිහිනෙක පැටලිලි
කඳුලක රිදවිලි
හසරැළි සිලි සිලි
සිත ළඟ නැවතිලි

දිවියේ ලතැවිලි
කඳුළුද සැනසිලි
ගෙන එයි යළි යළි
මතකයේ සැරසිලි

Sunday, December 12, 2010

හිමිකමක් නැති

හිමිකමක් නැති සඳ
ළඟින් ඉන්නට ඉඩ නැත
තැවුල් කියනට නොතැවෙත
නේන බව වත් නොකියත!

http://minikavi.blogspot.com/2010/12/blog-post_8714.html

Saturday, December 11, 2010

සෙවනැලි

ඇඟිලි තුඩු වල හැපී
අහිමි වන හැමදේම
දෑත පා රැකගන්න
නොහැකි වන හැමදේම
සෙවනැලිම නිති හෙලයි
දිවි මඟේ හැමදාම

Thursday, December 9, 2010

සුභ අසුභ

දෑස තරයේ පියා
නුඹ ළයේ හිස හොවමි
මේ කඳුළු බර අඩුයි
නුඹ ළඟින් හිඳින තුරු

සුභ දසුන් දුක් වදන්
සමෝසම විඳ ගනිමි
මේ ලොවේ විස නැසෙයි
නුඹෙන් ඔසු ලැබෙන තුරු

Tuesday, December 7, 2010

jacaranda shade














මීදුමෙන් වැසුණු ලෙස
දම් පැහැති මල් පිපුණු
තුරු වදුල පෙනෙයි මට
නිදිබරවූ හවස් කල

අකුරු මැද රැඳුණු සිත
කවුළුවෙන් එපිට දුර
දම් පැහැති මල් අතර
පාව යයි විටින් විට

අකීකරු ගමන් යන
තවත් මේ වැනිම සිත්
එ’මල් ගොමු අතර මැද
මුමුණාවී රහස් රැස

Monday, December 6, 2010

මුතු කඳුළු

නින්දකින් අවදිවී
වලා පට මෑත් කර
සඳ එබුනි ලොව වෙතට
සිහින විසිරුවා දසත

ලෝකයෙන් වහන් වූ
අඳුරුතම එක් කොණක
මුතු බිඳක් ඇස ගැටුණි
විනිවිදින සඳ නෙතට

විහිදුවා මුදු කිරණ
දෑත පා සිඹ සැනෙක
සඳ වතට ලං කරන්
කඳුළු පිසලිය හනික

දුර සඳට ලොබ බැඳන්
මලක් පෙර එක දිනක
හෙලූ කඳුලැලි ගඟක්
මුතු වෙලා මේ ලෙසට

දෙකඩ වූ මුත් සිතම
මුතු බිඳත් හද සඟව
සඳ ලොවට එළිය දෙයි
කිසිත් නොවූ විරූ විලස

Sunday, December 5, 2010

destiny?

දරා ගත නොහී මට
ඔය සෙනෙහෙ සුවඳ පොද
නොසිතු මොහොතක පවා
උතුරාවී කඳුළු නෙත

සංසාර පුරුදු ලෙස
නොවී නම් බැඳුනු සිත
හද ගැහෙන හඬ පවා
සිතට ළඟ කෙලෙස මට?

Thursday, December 2, 2010

නුඹමය

සිත ළඟ
දැවටෙන
නැළවෙන
නුඹමය

කඳුලක
සතුටක
පැහැයත්
නුඹමය!

Wednesday, December 1, 2010

"පැතුම් නොපතමි"
















සැඩ කිරණ වැදි
පෙතිත් මැලවුණි
හිතත් රිදි රිදි
සුසුම් ලං වුනි

හවස වට වැසි
රැසට තෙමි තෙමි
එමල හිනැහුණි
දුක නොදත් මෙනි

“පැතුම් නොපතමි
සිහින නොදකිමි”
සිහින් මිමිණිලි
මලෙන් මතුවිණි

Tuesday, November 30, 2010

ලොවම නවතියි

මතක අතරින් කැලතිලා
නොසිතු මොහොතක සැඟවිලා
නුඹේ සුවඳක් පාවෙලා එයි
පුරුදු සුසුමක දැවටිලා
කොපුල් තල දෝතින් වෙලා
සිනා මුව වෙත ලං වෙලා
එකම මොහොතක් හිඳිනු හැකිනම්
ලොවම නවතියි සසැලිලා

Sunday, November 28, 2010

දින දින ගෙවමි

දෑස දැවෙන
නොපෙනෙන දුර
සිත තනියම ඇදුනි..
ගත මිස මෙහි
නතර වේවි
වෙන කිසිවක් නොමැති..
දෙපා වෙලූ
රැහැන් බරින්
හදවත තටු සිඳුනී..
ඉතින් තවත්
සිත නැතිවම
මම දින දින ගෙවමි..

Thursday, November 25, 2010

තුරල් වැහි
















සතර අත කළු කරන්
කඳුළු මිරිකන අහස
අහම්බෙන් ඇස ගැටුණි
සිනහා උතුරන දෑස
එකතු වී වලාකුළු
කියා තුඩ තුඩ රහස
රන් රුවැති ඉර මලට
තිමිර ඇරියා විගස

Monday, November 22, 2010

ගිම්හාන

ගහකොලද දළු සිඳී
සුළං රැළි නිදි වැදී
බරැති හුස්මන් පමණි
සතර අත ඇදි ඇදී
හිරු කිරණ මැද රිදී
මල් කැකුළු පණ අදී
ගිම්හාන මාසයක
තතු ඇසෙයි රැව් දිදී

Sunday, November 21, 2010

chaos theory

ඒ සමනල තටුව හැර
වෙන සමනල තටුවක්
සසල විණි නම්..
නුඹම
වෙනස් කුණාටුවක් වෙනවාද ?

Saturday, November 20, 2010

නමක්?

හදවතේ ගැඹුරු තැන
නිරතුරුව කැළඹවූ
දෙතොල් අග හස රඳා
නෙත කඳුළු පුරවලූ
මතක රැඳී පොතක් සේ
හුරුපුරුදු බව කියූ
සිතේ නුඹ ඇඳි ඉරට
මට නමක් පවසනු

Thursday, November 18, 2010

විස කටු මැද


විස කටු මැද පිපි
මුදු පෙති සිපගමි
සීරුණු තොල්අග
සිනහම රඳවමි
මල මුදු සුවඳින්
රිදුම් ඉවතලමි
කටු වල පැටලුනු
සිහිනය සුරකිමි

Wednesday, November 17, 2010

තුති!

පිටු අතර මගේ කවි
රඳවන්න වෙහෙස වූ
නුඹේ අතැඟිලි සිඹිමි..

නුඹේ ළබැඳි බව ළඟදී
නෙත උනන කඳුළු කැට
ඉතින් සඟවා ගනිමි..

Tuesday, November 16, 2010

කිව මැන

මගේ සුසුමට
තවත් නුඹගේ
එකම සුසුමක් මුහු කරනු මැන
නුරා නෙතු අග
පිපෙන හැඟුමන්
සිහිනයක් නොව සපථ කළ මැන
හද කුටිය මැද
අගුළු ලාගෙන
නවාතැන් ගත් අයුරු කිව මැන
පැතුම් නුපදා
මතක අද්දර
දිවි ගෙවන'යුරු කියා දෙනු මැන

Saturday, November 13, 2010

නෑකම

කවුළුවෙන් ඈත ඉම
නෙතු දිවෙන මානයේ
පුංචි කහ මල් ගැවසි
අති විසල් ගසක ඇත
වැටෙනමහා වැසි මැදත්
හෙමි හෙමින් හිස සලා
සිනාසෙන ඒ ගසට
ඈත නෑකමක් ඇත

Thursday, November 11, 2010

දවසින් දවසට

හිරු පිපි අහසක
පැහැබර දවසක
කවියක් වී හිත ළඟට වෙලා
මොහොතක් හිනැහී
සිත යට කිමිදී
පාවී යනු මැන විලස වළා
ගනඳුරු අහසක
වැහිබර දවසක
සුසුමක් වී හදවතම වෙලා
මොහොතක් ලතැවි
සිහිනෙක දැවටී
ගිලිහි යනු මැන කඳුළු වෙලා

Tuesday, November 9, 2010

සදා ඉන්නම්















රළු පරළු ගල් අතර
කඩා වැටි තරුවක්ව
දූලි වැකි මංපෙතක
වැටුණු හිම කඳුලක්ව
රටා පිරි දිවිමඟේ
නොගැලපෙන ලකුණක්ව
සදා ඉන්නම් සිතේ
හෙලනු බැරි සුසුමක්ව

Monday, November 8, 2010

Sunday, November 7, 2010

rain and shine

හිරුරැස්ම එවන්නට
පිළින දුන් වසත් කල
තරහා වී විටින් විට
වැහි බිඳුම එවන හැඩ
නිරතුරුව සිනාසෙන
සොඳුරුතම නුවන් යුග
ඉඳහිටක නපුරු වී
විදිලියක් ඇඳෙන ලෙස

Saturday, November 6, 2010

november

අඳුරු වැහිබර
නොවැම්බරයක
කඳුළු උතුරන
පාලු හවසක
පෙරදිනක මා
සතුට වැලලූ
මෙබිම කැණ යළි
සිනහ සොයනෙමි

Thursday, November 4, 2010

සුළඟ අත එවමි


















මඟ දෙපස පිපෙන මේ
කැලෑ මල් පොකුරකින්
සුළඟ අත නුඹ වෙතට
එක මලක් එවන්නම්...
අහම්බෙන් ඇසිල්ලක
නුඹේ කොපුලේ දැවටෙන්න
සිනහවක් ගෙන එන්න
ඒ මලට කියන්නම් ...

Tuesday, November 2, 2010

ලතැවිල්ල

නෙළුම් පතක් මත
දඟ පෑ පිණි බිඳ
මොහොතින් දියමත
වැතිරී සැඟවිණි...
නෙළුම් පතේ
සලකුණු කිසි නැතිවද
නැතිවූ දියබිඳ
ගැන සිත ළතැවිනි...

Monday, November 1, 2010

100 words for you, of you

to savour, to treasure,
but to never experience
to rely, to confide
but to never talk
to long for, to desire
but to never touch
to amuse, to laugh with
but to never bore
to strain, to wait for
but to never reach
to overwhelm, to annoy
but to never clash
to dream of, to imagine
but to never see
to puzzle, to tease
but to never taunt
to wonder, to muse
but to never know
to applaud, to support
but to never witness
to feel, to understand
but to never find
to adore, to love
but to never have

written for
http://onezerozerowords.blogspot.com/2010/11/100-words-for-you-of-you.html

Saturday, October 30, 2010

elusive

සිහින කළතා
අහසේ අඳිනෙමි
පාට සියයක් දිලෙන දේදුණු...
ඒ අතර නුඹ
හිමින් ඇවිදින්
හිරු මුවාකර සිනාසෙන’යුරු !
සරැළි කළතා
දියෙහි ලියනෙමි
වදන් නැති මගේ කවිය සුමියුරු...
එදිය රැළි මැද
කුමුදු පුබුදා
නුඹ සඳක් වී සිනාසෙන ‘යුරු!
සිතැඟි කළතා
හදෙහි තවරමි
සිඹින්නට බැරි මලක රොන්සුණු...
නුඹ සුළඟ වී
ගතේ දැවටී
සුවඳ ගෙනැවිත් සිනාසෙන’යුරු!

Thursday, October 28, 2010

පිටු අතර

පිටු පෙරලන
නුඹේ අතැඟිලි අතරේ
දැවටෙයි හෙමිහිට
මා සතු සුසුමක්...

Wednesday, October 27, 2010

මොහොතක්

තණකොළ මලකට
පෙම්බැඳි දවසක
පිණි බිඳුවක් රහසේ හැඬුවා..
මොහොතක් සිපගෙන
මොහොතින් සමුගෙන
හිරු රැස් හා සැඟවී මැකුණා..

Tuesday, October 26, 2010

වැහි බිංදු

දුර ගෙවා අහස පිස
වැටෙන හැම වැහි බිඳක්
මලක් මත වැටෙන්නට
පෙරුම් පුරනවා ඇතිද?

අහස දෙස පෙති විදා
සිනාසෙන හැම මලක්
වැහි බිංදු ලබන්නට
පෙරුම් පුරනවා ඇතිද?

Sunday, October 24, 2010

නුඹ, මම.. වදන් සියයෙන්

හීන අහුරක් දෑත ගුලිකර
හිත් ඉමේ පියමනින්නේ නුඹ
නුඹට හිමි නැති මටද හිමි නැති
ලොවක ලස්සන දකින්නෙමි මම

බිඳෙන උපදින හැඟුම් අද්දර
සොඳුරු ඉසිඹුව මවන්නේ නුඹ
ඇඟිලි තුඩු අග පිපෙනවා මෙනි
මුදු සිහින රඟ විඳින්නෙමි මම

හදවතේ ඉරි තැළුණු සලකුණු
සෙමෙන් පිරිමැද මකන්නේ නුඹ
දෑත නොපොවන දුරක සිටියත්
නුඹේ සුසුම් සුව සිඹීන්නෙමි මම

කඩ ඉරෙන් ඇඳි සිතුවමක් සේ
සිතේ ගැඹරක ඇඳෙන්නේ නුඹ
පාට හැඩතල පුරනු නොහැකිව
සසැලෙමින් නිති හඬන්නෙමි මම

අවර අහසක නුහුරු දවසක
පුර සඳක් සේ පිපෙන්නේ නුඹ
සිහිනයට වැඩි හැබෑවට අඩු
මිරිඟුවට පෙම් කරන්නෙමි මම

http://onezerozerowords.blogspot.com/2010/10/blog-post_24.html

Wednesday, October 20, 2010

කඳුළු මාලය

මේ කඳුළු මාලයේ
අඩුපාඩු පුරවන්න
නුඹේ කඳුළු තියේ නම්
එන්න එය සරසන්න

Sunday, October 17, 2010

කවි පවුර

සිතට රිසි සේ
අකුරු අමුණා
හිරි අරින්නට
ඉඩක් නැහැ දැන්...
හිතේ ගල් වුණු
කවි බිඳිති ටික
එකතුකර මම
බඳිමි පවුරක්!

Friday, October 15, 2010

.....

අඳුරු රුදු වැහි වැටෙන
බොල් හීන ඉකිබිඳින
තවත් දවසක් ඇවිත්
මගේ ලොවට හිරු නොඑන
මුදු කසුන් රිවි කිරණ
ළඟට වී සිත සිඹින
සිහිනයක දිනක් වෙයි
කඳුළු දිය නෙත සිඳෙන

Thursday, October 14, 2010

වැලි මාළිගා

බිඳෙන් බිඳ නුඹ ගෙනත්
මගේ හිතට ගොඩගහන
මේ සිනා ළවැලි ගෙන
මාළිගා තනමි මම
සයුරු තෙර කළඹමින්
රුදුරු රළ නැඟෙන ඉම
නොතනන්න මාළිගා
උගෙනගමි ඉතින් මම 

Tuesday, October 12, 2010

නුඹ දුර නැත

















දුර අහසක දුල සඳවත
සිප ගනු කිසි දින හිමි නැත
දැන දැන සඳ රැස් සයුරත
කිමිදී හද මල විකසිත

සඳ රුව දැක විල් තල මත
නුඹ දුර නැත, පවසයි සිත
විල් දිය රැළි නිති සසලිත
නෙත ඉනු කඳුළැලි සඟවත

Sunday, October 10, 2010

as if you were nearby

to lurk in my memories
to hide in my sighs
you are just as so stubborn
as if you were nearby...
to touch my dreams with wonder
to fill my world with smiles
you are just as so lovely
as if you were nearby...
to brush away the hurt
and to make life seem worthwhile
you are just as so special
as if you were nearby...

Saturday, October 9, 2010

කැලෑ මල්

දස අතම පැහැය කර
ළපටි තණපත් අතර
කැලෑ මල් දිදුල දෙන
වසන්තය ඇවිත් ඇත
අරුණ සමඟින් පිපෙන
අඳුර හා සැඟව යන
ඒ සොඳුරු හැම මලක
සිහිනයක් සැඟව ඇත

Thursday, October 7, 2010

මේ කවි

කඳුළුයි මේ කවි
දෙනෙතින් නොවැටෙන

සෙනෙහස උතුරා
සිත ළඟ දැවටෙන..
නුඹේ නමින් නිති
හද තුල උපදින..

කඳුළුයි මේ කවි
දෙනෙතින් නොවැටෙන

Tuesday, October 5, 2010

මේඝ දූත

සීතල වැහි බිඳු
උණුසුම් කරනට
ඇසුරු සැණෙක
නුඹ ළඟට වෙලා..
මේකුළු අතරේ
දවටමි පැතුමක්
පා කර එවනට
නුඹව සොයා..

Monday, October 4, 2010

සිහිනෙක සුවඳක්

තරුවක් ගිලිහුණ
තැනකින් අහසේ
තරුවක හැඩයක් ඉතිරිවෙලා
කඳුළක් බොඳ වුණ
දවසක මනෙතේ
කඳුළක ලකුණක් ඉතිරිවෙලා
යුගයෙන් යුගයට
සුසුමින් සුසුමට
නුඹ මගේ හදවත ළඟට වෙලා
කඳුලැලි පිසිමින්
හසරැල් ගෙනෙමින්
සිහිනෙක සුවඳක් තිළිණ කළා

Thursday, September 30, 2010

අමාවක

ආකහේ සළු මතින්
තරු ගඟම ගිලිහිලා
අමාවක මකන්නට
නුඹේ දෙනෙත් නැත දුලා

අඳුර මම හැඳිනුවෙමි
නුඹ එළිය දුන් නිසා
සිනහවක් සිඹින්නෙමි
නුඹේ මතකයෙන් ගෙනා

හෙටක නුඹ ළඟට වී
සිහිනයක දැවටිලා
නුඹේ නෙතු කැල්ම ළඟ
කඳුළු සඟවමි නොලා

....

සිත ගැඹර ඉකිබිඳින
මේ සුසුම් රැළි දහස
පාළුවම නම් නොවේද
ඉදින් නුඹ දුර ඈත...

Tuesday, September 28, 2010

නුඹ නොආ දා

නුඹ එනතෙක්
දෑත ගුලි කළ සුසුම් රැස
විසිරුවෙමි දස අත
මල් පොඩිති
ඉන් පිපෙනු ඇත

Monday, September 27, 2010

somewhere

somewhere down the rainbow
there is a special place
where I won’t have to be strong
just in case

 somewhere down the rainbow
that will be the place
where I can be in your arms
and be in peace

 somewhere down the rainbow
I wish there was a place
where I won’t say I miss you
as you’ll always be close

Sunday, September 26, 2010

උඩවැඩියාවට

නුඹ මගෙන් දිවි ගෙවයි
නුඹ නිසා දිවි ගෙවමි

Saturday, September 25, 2010

lost

සදාතන වස්සානයක් මැද
සීතලෙන් උණුසුමක් සෙව්වෙමි
දෙකොපුලෙහි කඳුලැලිත් මිදුනත්
වැසූ දෙනෙතින් හිරු දකින්නෙමි

දෙනෙත කඳුලැලි ඉතිරි වී නැත
කඳුළු සාගරයක් හෙලූවෙමි
දිවියේ සුවිසල් පතන් බිම් මැද
තවම සෙවනක් සොයා යන්නෙමි

සුළං අතටම ගසාගෙන ගිය
අතීතයේ සිතුවම් දකින්නෙමි
සිසිරයේ රුදු කුණාටුව මැද
මඟ හැරුණු මල් පියලි ඇහිඳිමි

Tuesday, September 21, 2010

කතර මැද

රළු ළවැලි දැවටුන
නිරුද කතරක් අසබඩ
පිපාසිත සිත මම
නුඹයි වට හිරිපොද රැස

මැණික් සේ දිදුලන
වැලි කැටිති මේ හැමතැන
සීරිලා හදවත
රුහිරෙන් අඳිමි සිතුවම

නුඹෙන් දුටු කෙම්බිම
මිරිඟු දිය වුව කම් නැත
තෙතක් නැති ලොව තුල
පතොක් මල වෙමි නුඹ ළඟ

...

පවනක්ව දැවටෙන්න
සිත තනිය දුරලන්න
ගීයක්ව මිමිනෙන්න
රහසින්ම ළඟ ඉන්න

නෙතු දෑලේ තනිවෙන්න
වරම් නැත ලංවෙන්න
දිදුල දෙන සඳ වැන්න
දුරින් ඉඳ හිනැහෙන්න

Monday, September 20, 2010

රටා

ඊයේ..
අද හා
මතුත්,
රටාවෙන්
පිටත
මම

Sunday, September 19, 2010

අහඹු

නුඹ..
සින්නයට ගත්
අහඹු සිතුවිල්ල!

Thursday, September 16, 2010

මගේ සුසුම

දෙනෙත තැවරුණ විඩා සිඳිනට
පුංචි සුසුමක් මගෙන් නුඹහට
ළඟට වී අතැඟිලි සිඹින්නට
ඉඩක් නැති දින සුසුම ගනු මැන

නේක හැඩ ඇති සුසුම් ළඟ ඇත
ලෝකයෙන් නිති මුවා කළ හැකි
නුඹ නමින් ඇති සුසුම් පමණක්
රහසේම සිත දෙකඩ කරවන

ජීවිතේ බර දරා වෙහෙසව
සිත් සතන් හිරිවැටුණ මොහොතක
දුරක සිට මා එවන සුසුමක්
නුඹට නිතරම තනි රකිනු ඇත

Wednesday, September 15, 2010

බැඳීම

හිරුට පෙම් කළ
සරුංගලයකි...
නූලකින්
ලෝකයට බැඳ ඇති

Tuesday, September 14, 2010

මායාව

හිමි වුනත් ළං නොවෙන
ළං උනත් හිමි නොවෙන
මායාව මෙයම වෙයි
ජීවිතය නම් කියන!!

Monday, September 13, 2010

සොයමි

පවන් රැල්ලක එතී
දඟ කරන් පාව යන
වරා මල් පියල්ලක
මගේ හදවත තබමි

හිස් අහස් කුස පුරා
දස අතම සැරි සරා
තුරු ලපළු මුදුන් වල
ගිමන් හරිමින් හිඳිමි

මගේ හදට හුරු සුවඳ
තව වරා මලක්‌ ළඟ
පෙති අතර සැතපිලා
සන්හිඳක් නිති සොයමි

Sunday, September 12, 2010

උදෑසන

පිණි සිඹින මලක් ළඟ
නුඹේ සෙනෙහස තබමි..
උදා රැස් වළල්ලෙන්
දිදුලනා ලොව දකිමි..
වළා කැරළිති අතර
සැඟවෙනා රුව සොයමි..
සුළං රැල්ලක තබා
රහස් නුඹ වෙත එවමි..

Thursday, September 9, 2010

සියවැන්න!


සමසක් පුරාවට
හද විල් තල මත
පිපි පියුම් අතරින
නුඹ නමින් සුපිපුණ
මෙයයි..
සිය වෙනි මහනිල..

කවි සිත් සිඳුණු හදකින්
කවි ගඟක් මවන්නට
එකව් දිය ලොව බෙදන්නට
නුඹ ළඟින් උන් බැවින
මෙකවි අස්වනු හැම
හිමිකරුත් නුඹමය!

Wednesday, September 8, 2010

අහිමි

කලාතුරකින් වුවද
නුඹ ගෙනෙන සතුට පොද
මගේ සිතට නුහුරු බව
ඉඳුරාම මම දනිමි
නුඹේ අත්ලත තබමි
ඉන් එකම සිනහවක්
මට අහිමි දෑතකට...
මට අහිමි සිනහවක්...

Monday, September 6, 2010

පහන

පහන් දැල්ලක් දකිමි
දිලි දිලී සසල වෙන
නිවෙන්නට තතනමින්
යළි යළිත් එළිය දෙන
අඳුරු තිරපට ඉරා
ලෝකයට දෙනෙත් දෙන
ඉන් තමා දැවෙන බව
දැන දැනත් නොනවතින

Friday, September 3, 2010

...

"රෑ ලියූ කඳුළු කවි
අරුණ හා වියැකුණිද"
නුඹේ හසරැල් ළඟදී
කඳුළු මැඬ සිනාසෙමි

නපුරු සිහිනයක් මැද
මංමුලා වී ගෙවන
මගේ දිවියේ රැය පමණි
නුඹට මම නොපවසමි

Thursday, September 2, 2010

Wednesday, September 1, 2010

කඳුළු ගඟ

කොහේ හෝ ඈතකදී
වැටුණු පොඩි කඳුළකින්
මේ කුඩා දොළ පාර
පෙරදිනෙක මැවෙන්නැති

අතරමඟ හැම නෙතින්
උපන් කඳුලැලි අරන්
හෙමි හෙමින් කොඳුරමින්
මේ ලෙසට ඇදෙන්නැති

මඟ දිගට පය හැපෙන
දුක් කැබලි සිලුටු කොට
කඳුළු ගඟ ගැඹර මැද
සඟවලා තබන්නැති

කඳුළු බිඳු සිය දහක්
ලැගුම් ගත් සයුර ළඟ
මේ කඳුළු බර හෙලන
සිහිනයක් දකින්නැති

Tuesday, August 31, 2010

සිහින ගෙත්තම

මතකයට විසිකරන්නට නම්
හිත් නොදෙන මේ හාදු අහුරම
දෝතකට ගෙන කොපුල අද්දර
සඟවාගන්නම් රෑ පුරාවට...

කල්පයක් රැඳී අඳුර බිඳගෙන
කලා පිරි සඳ ලෙසින් පායන
නුඹේ සිනා වත ගෙත්තමක් වී
දකිමි මම හැම සිහින සළුවක...

Sunday, August 29, 2010

....

සිනා සයුරක් අතර
කඳුළු බිඳුවක් රකිමි
කල්ප වැස්සට තෙමුණ
හදවතක් පිරිමදිමි

නොනිමි සීතලක් මැද
නිරතුරුව කල් ගෙවමි
ලෝකයට වහන් වී
කඳුළු කව් පද ලියමි

Friday, August 27, 2010

wishes

unbidden they arise
hiding in heartbeats...
whispering softly
of the sadness
of sweet longings...
vanishing into thin air
on the wings of
secret sighs..
wishes they are

“only if they came true!”...

Wednesday, August 25, 2010

නොලියනා කවි

කියන්..
නුඹ
දකිනවද...
මා
නොලියනා
කවිත්?

Tuesday, August 24, 2010

පෝදා කවිය

පෝදා ද වගක් නැති
මේ අඳුරු වැහි වළා
සඳේ රුව මකන්නට
හඬා වැටෙනා තරම්!!

Monday, August 23, 2010

සෙවනැල්ල

අත ළඟම සේ පෙනෙන
මායාව සිත දවන
නුඹයි සෙවනැලි දහස
ළඟ වුනත් ළඟ නොවන

එළිය සමගින් මැවෙන
අඳුර ළඟ සැඟව යන
නොපෙනුනත් ළඟින් ඉඳ
හිතට එබිකම් කරන

කිසිදිනක හිමි නොවන
කිසිදිනක වෙන් නොවන
තනිකමට තනි රකින
සෙවනැල්ල නුඹ සබඳ

Sunday, August 22, 2010

සිත අරවින්ද

සිත් මලක පෙති සින්ද
කඳුළු නිති නෙත බින්ද
යුගයේ කටු කළලින්ද
වැසුණි සිත අරවින්ද

දහක් මුදු වදනින්ද
සිහින සුව පහසින්ද
නුඹ ළඟම සුව වින්ද
පිපුණි සිත අරවින්ද

Saturday, August 21, 2010

plum blossoms

නූපන්න වසන්තෙට
ඇඟිලි ගනිමින් තුටින්
හිම පියලි පිස හමන
සුළං ඉවසා සිතින්
පොකුරකට තුරුළු වී
මුදු රහස් කොඳුරමින්
ප්ලම් කුසුම් පිපී ඇත
හෙටක අරුමය අරන්

Friday, August 20, 2010

හිරු..සඳු

රැයක් පිපෙයි මට
නුඹ හිරු ළඟ තව
සුසුමක් සඳු අත
කෙසේ එවන්නද?

ලෝකය නවතින
හිරු සඳු සැඟවෙන
දිනයක් එයි මතු..
පැතුම් පතන්නද?

Wednesday, August 18, 2010

මුතුහර

නුඹ මගේ නෙත කඳුල
සිනාසෙද්දී වැටෙන
සොඳුරු හසරැල්ල නුඹ
කඳුළු අතරින් පිපෙන
කඳුළු මුතු සිනා මිණි
එකින් එක නුඹ ගෙනෙන
මුතුහරක රඳන්නෙමි
හදෙහි සඟවා තබන

Tuesday, August 17, 2010

පියඹමි!


නුඹ ඇඟිලි තුඩු අග හිඳ
විදාලමි පියාපත්
නිදහසේ සරන්නට
මායා ලොවක් තුල

Monday, August 16, 2010

නුඹේ සිනා

සිනා හිඟ සීත කල
තොසින් කල් අරිනු වස්
නුඹේ සිනා එකින් එක
හදට එක්තැන් කරමි..
කඳුළු මේ කුළු පිරුණු
අඳුරු සීතල දිනක
ඒ සිනා ගෙන තවා
හදම උණුසුම් කරමි...

Saturday, August 14, 2010

බඹරින්ද

රොන් සුණුද මකරන්ද
මල්මී ද රස වින්ද
මලක බඹසර බින්ද
මමයි සකි, බඹරින්ද

මා පෙමට ලොබ බැන්ද
හැම මලට පවසම්ද
ලොව දසත සිත් බින්ද
මමයි සකි, බඹරින්ද

Friday, August 13, 2010

අතරමං










මුහුදටත් හිමි නැතිලු
පුලිනයේ රැඳුණු පසු..
වෙරළටත් හිමි නැතිලු
සයුරතෙන් මිදුණු පසු..
පැහැය වියැකී මැකෙන
ටිකෙන් ටික මිය ඇදෙන
සිප්පි කටුවක් බලන්
හීන අමතක කරන..

Wednesday, August 11, 2010

සිහිනයක රැවටිල්ල

ඉහ හැරුණු අත දුවන
ඉබාගත සිතුවිල්ල
නුඹ ළඟම නතර වී
කිමද මේ කැළඹීල්ල
හීතලම කඳුළු බිඳු
ඔය රස්නේ අත් දෙකෙන්
පිහිනවා සේ දැනෙයි…
සිහිනයක රැවටිල්ල!

Tuesday, August 10, 2010

කගපත

හදවත
පිරිමැදි
කගපත,
සෙනෙහස!

Monday, August 9, 2010

කොහේ හෝ

ඇහැළ මල් පියවිලි
විමන් සැරසූ මේ බිම
සිනහ හා කඳුළුද
දොරේ ගලනා මේ බිම
මගේ කුඩා හීනද
කොහේ හෝ මිහිදන්ව ඇත තව ..

Sunday, August 8, 2010

නුඹ මා ළඟම...

හිමිකම් නොකියමී ගණ නිල් නුබ තලට
දේදුනු සේම නිලි වැසි පුරුදුයි හදට
මන්දාරම එබෙන කළුවර රුදු රැයෙක
තවමත් පෙම් බඳිමි අත දිගු නැති නුබට

වැහි පොද විලස හිමි නැති අහසින් වැටෙන
සුළඟක් විලස මේ කුළු කලඹන දසත
පැහැයක් විලස පෙරඹර බොඳවී පෙනෙන
මම නුඹ දකිමි හැම තැන...නුඹ මා ළඟම!

Friday, August 6, 2010

සිනාසී..

මේ සුසුම බර වැඩියි
නොහෙලාම සිනාසෙමි
මේ කඳුළු නෙත දවයි
බොඳ නෙතින් බලා ඉමි
සිතන්නට වරම් නැති
සිතුවිල්ල අතරමැද
කිසිත් නොවූ විරූ සේ
සිනාසී දිවි ගෙවමි

Thursday, August 5, 2010

පෙණ බුබුල


රැගෙන යනු මැන මා ද
සැහැල්ලුව දිදුල දෙන
නුඹ අයිති ලෝකයට..
එකම එක මොහොතකින්
බිඳී යන ලෝකයට.. !!

Wednesday, August 4, 2010

සුබ නිමිති

ගනඳුරට තනි රකින
කවි සිතම නිදි වරණ
ඉතින් මේ රෑ පුරා
සොඳුරු කවි වැල් ගෙතෙන

ලොව එළිය දෙන අරුණ
රන් කිරණ දැක නිතින
සුබ නිමිති සොය සොයා
නුඹ ළඟට සිත ඇදෙන

Tuesday, August 3, 2010

එකම අහසක් යටදි

බොහෝ දුර ඈත සිට
සිත ළඟම දැවටිලා
දෙතොලගට නුඹ ගේන
සොඳුරුතම හසරැල්ල
එකම අහසක් යටදි
මුණගැහෙන හෙට දිනෙක
නුඹේ නෙතු ගැටුණු විට
දහක් දේ පවසාවි...
නමුත් මා ගොළු වේවි...

Monday, August 2, 2010

....

අද නුඹට
නොදුන් හාදුව
බෝ දුකෙන්
අත්ල මත තබා
උතුරු සුළඟේ
පාකර එවමි..
මතක ඇතිව
අහුලා ගන්න

Saturday, July 31, 2010

පාලුවට තනි රකිමි














කුණාටුව උමතු වූ
වස්සාන ඉසිඹුවක..
කවුළු දොර එපිට රූ
බොඳව ගිය නිමේෂෙක..
උණුසුම් වූ කුටිය තුළ
පාලුවට තනි රකිමි..
හදේ පිරි මේ සීත
කොහෙන්දැයි ගතු සොයමි..

.....

දහවලද රැය පුරා
දෙනෙත් නොවසා තියා
සිහින දුටුවෙමි නිතින
හදේ සෙවනැලි මවා

රුදුරු ගනඳුර ඉරා
නුඹේ දෙනෙත් දැල්විලා
හද කුටිය එකලු විය
දහක් එළි සේ දුලා

මෙතෙක් ආ මඟ පුරා
කඳුළු සලකුණු බලා
පෙරඹරෙහි නුඹ පිපී
නැකත් තරුවක් වෙලා

Friday, July 30, 2010

ළඟ ඉන්න...

දස දහක් සිනා රැළි
මුව මුවඟ සරසන්න...
සුවහසක් කතා පොඩි
නුඹේ කනට කොඳුරන්න...
උණුහුමට තුරුළු වී
සුසුම් රැළි සඟවන්න...
එළඹෙනා දිනක් වෙද
නුඹ මගේ ළඟ ඉන්න...

Wednesday, July 28, 2010

බිම්මල


වළ දැමූ අතීතෙක
දිරා ගිය හීනයක
පිපුණු බිම්මලක් වෙමි
හිරු සමඟ සිනාසෙන

කඳුළු ලකුණු

මෙතෙක් කල් මා
දෑත මිටි කර
සඟවා සිටියේ
සතුට, සිතුවෙමි
දෑත දිගහැර
බැලූ සඳ අද
තනිවූ කඳුලක
ලකුණු දුටුවෙමි

Tuesday, July 27, 2010

කවි උල්පත

කවි උල්පත් සිඳුන සිතක
හේබා ගොස් දැවුණු හදක
නුඹ ඇවිදින් රැඳුණු දිනෙක
සඳුන් සුවඳ දැනුණි සැණෙක

දිය රැළි සේම කවි පදවැල් ගලන දින
හසරැලි තොල'ග නිරතුරුවම රැඳෙන දින
සිහිනය අද්දරක නුඹ තනි රකින දින
එදිනයි ලොවම සොඳුරුයි මට දැනෙන දින

Monday, July 26, 2010

සිසිරයේ මල් කැකුළු


සීත සුළඟට බියව සසලව
පත් හැලුණු මේ කටුක අතු අග
ලොවට රහසින් කැකුළු මල් පොඩි
පිපෙන්නට වෙර දරන තාලය!

කලාතුරකින් එබෙන හිරු ඉරි
වෙතට මුළු හදවතින් පෙම් බැඳ
මොහොතකට අමතක කළා වද
තවම සිසිරය දුරුව නැති වග..?

Thursday, July 22, 2010

....

නෙතු රිදෙන දුරක සිට
නුඹ එවන සුසුමකට
නෙතු පොඟන කඳුලකට
පෙම් බඳිමි හැමදාම...

ඉදින් මේ කැළඹීල්ල
සැනසිල්ල, ලතැවිල්ල
සිත සොයන නැළවිල්ල
සොඳුරු වෙයි හැමදාම...

Tuesday, July 20, 2010

කවි ඔරුව

අකුරු අමුණා කවි ගොතන්
පිරූ පත්ඉරු නුඹ නමින්
තනා ඔරුවක්
පා කලෙමි මම...
මහා වැස්සේ සැඟවියන්!!

Monday, July 19, 2010

Pretend


I can pretend to be strong
as long as you don’t know I cry...
I can pretend not to care
as long as you are not holding me close..
I can pretend it is so easy
as long as you never see the effort...
I can pretend you are mine
as long as dreams exist…

නොහඬමි

නුඹ ළයේ හිස හොවා
ගෙවන මේ තත්පරය
කඳුලකට ඉඩ නොදී
සුසුමකට ලං නොවී
නෙතු පියා නිසල වෙමි
එකම එක අසුරු සැන
කල්පයක් වන තුරුම...
ලෝකයම අප නිසා
නවතිනා දින තුරුම...

Saturday, July 17, 2010

....

නුඹේ දයාබර බවම
දෝතකට අරගන්න
හදවතේ සඟවන්න
නිරතුරුව සිතේ මට...

රැය පුරා නිදි වරණ
ඉහ ළඟම තනි රකින
ඒ දයාබර බවම
අරුමයකි මගේ හිතට...

Friday, July 16, 2010

තරු වැස්ස














අර බලන් අහස තල
දිදුල දෙන තරු වැස්ස
දෙව් විමන් පිස වැටෙන
අසංකේය තරු පන්ති...
තුඩින් තුඩ නොකිව් පද
මුවින් මුව නොගැයූ ගී
තරු වෙලා අහස් ගැබ
පතිත වේ පොලෝ වෙත...
අහුලලා මේ වැටෙන
තාරකා පියලි හැම
ලොව අහිමි හැම පෙමට
මවන්නම් සමරුවක්..!

Wednesday, July 14, 2010

ක්ෂිතිජය, නුඹ-මම

අහස සිඳු සේ
බැඳී ඇත අප
ක්ෂිතිජ රේඛාවේ...
ලොවට මිරිඟුව
ලෙසින් පෙනුනද
එයයි අප සෙනෙහේ...
දෑත දිගු කර
අහස් කුස වෙත
සිඳු හඬයි රහසේ...
සයුරු රළ සිඹ
අහස සසැලෙයි
මන්මත්ව පහසේ ...

සඳ එළිය නුඹ


රැයේ තුන්යම පුරා
නිදි නොමැති නෙතු අරා
සඳ කිනිති සල සලා
සඳ එළිය නුඹ වෙලා ...

ඉතින් මට නිදියන්න
සඳ පහන හකුලන්න
නුඹේ වුවන දැකගන්න
හීනයක් වී එන්න...

Monday, July 12, 2010

unseen love

නිසල තුරු පෙළ සැලූ පවනකි
දිවා අහසක මැවුණු තරුවකි
දහස් හඬ මැද ඇසුණු සුසුමකි
හදේ බිතු මත ඇඳුණු පැතුමකි

විලක ගැඹරක සැඟවී නෙළුමකි
අහස් තල මත තැවරී පැහැයකි
සියොත් රාවෙක සියුම් තනුවකි
අතීතෙන් එන මතක සුවඳකි

Thursday, July 8, 2010

casablanca

කියනු මැන මට
ලොවම පීරා
කිමද මා ළඟ
නතර වූයේ..
සිනහ සඳ කැන්
දෝතටම ගෙන
මසිත් කොඳ පෙළ
පිබිදවූයේ..
හදේ ඇවිලෙන
තැවුල් සිඹ සිඹ
ඔසුම තවරා
සිසිලලූවේ ...
ජීවිතේ තව
එක් වතාවක්
සිනහ ගෙනෙනා
වරම වූයේ..

Tuesday, July 6, 2010

දුටුවෙමි

මසිත් පතුළත අතගා
නුඹ සොයා ගත් මුතු කැට
නුඹ දෑස ගැඹරේම
දිදුලනා හැටි දුටුවෙමි...
මගේ සුසුමක දවටා
නුඹට දුන් පළමු හාදුව
නුඹේ සිත අද්දර
සසැලෙනා හැටි දුටුවෙමි...
සසර මංපෙත අවුරා
ඇඳෙන වියැකෙන රූ මෙන්
දෑඟිලි බැඳුණු සලකුණු
කඳුළු අතරින් දුටුවෙමි...

....

සසල හැම ඇසිපියක් ගානේ
බිඳෙන හැම සුසුම් රැළි ගානේ
ඔබ දැවටී මගේ සිතුම් මානේ
සිනා ඇතිරුවා මිරිඟු හීනේ

Sunday, July 4, 2010

වැහි
















බොඳ කරන් මඩ කඩිති
යළි යළිත් වහින වැහි..
මල් කැකුළු අතු අගින්
බිමට ඇද දමන වැහි..
කළු වළා පොඟවමින්
අසනි දී හඬන වැහි ..
කඳු වළල්ලෙන් එපිට
පාවෙලා යන්න වැහි..!!

Friday, July 2, 2010

නුඹයි!

නොගැයූ හැම ගීයකම සිහින් තනු රැස නුඹයි
නොපිපි හැම කඩුපුලක මතක සුසුවඳ නුඹයි
නොසිඳි හැම උල්පතක සසල දිය රැළි නුඹයි
නොවිඳි හැම හීනයක සොඳුරු ඇරඹුම නුඹයි

සුපැතුම














නුඹ නළල සිඹ
පතන්නෙමි මම
සුභම දවසක
සුභම පැතුමක්...
දුරක සිටියත්
සිත ළඟයි මා
රැගෙන නුඹහට
හාදු අහුරක්...
අදත් හෙට හා
එළැඹි හැම දින
රැඳේවා සිත
නොනිම් සතුටක්...
සිහින සිතුවම්
දෑස අද්දර
මැවී ඉටුවන
සොඳුරු යුගයක්...
ඉතින් සුපතමි
සුභම දවසක්..!
සිතුම් ඉටුවන
සුභම වසරක්..! :*

Tuesday, June 29, 2010

සුළඟයි නුඹ මට

ලොවටම රහසින්
සියොළඟ දැවටෙන..
කෙහෙරැළි අතරින්
අතැඟිලි දුවවන..
සීතල හාදුම
මුව මත සතපන..
ඇසුරු සැනින් යළි
සැඟවී නොපෙනෙන..
සුරතල් වී
මා තුරුලෙහි සැතපෙන..
විටෙකදී රුදුරුව
සිතිවිලි කළඹන..
හද ගිම් සනහන
සුසුමක් ගෙන එන
දෑසට නොපෙනෙන
සුළඟයි නුඹ මට ..

නොදකින තරුව

මේ
මහා ගගනත
සැවොම නෙත ගැටෙන
කිසිකෙනෙක් නොදකින
හිමිහිට එළිය දෙන
තරු කැටය
වෙමි
මම

Monday, June 28, 2010

පලුදු හද

පලුදු වී දැදුරු වී
අතරමඟ බිම වැටී
තිබූ මගේ අඳුරු හද
නුඹේ දෝතට රැගෙන
සීරුවෙන් පිසදමා
කඳුළකින් නහවලා
දුක් සුසුම් දුරැරලා
ලෙහි හොවා සැතපුවා
ඒ බිඳුණු හදින් නැඟී
බිඳිති හසරැල් සමඟ
සිහින් රිද්මය යළිත්
ඇසෙන්නෙ ද නුඹට දැන්?

Saturday, June 26, 2010

....

කවියක් වෙලා හද පතුලෙහි උපදින්න
හෙමි හෙමිහිට නුඹ කනටම කොඳුරන්න
සෙවනැල්ලක්ව සිත් පව්වෙහි දැවටෙන්න
බෝ දුර ඉඳන් මගේ සිත සනසාගන්න

Wednesday, June 23, 2010

I cry..

I cry for all things
that are so special
since you came into my life...
I cry for all things
that never will be the same
even if you leave me...
I cry for finding completeness
in two separate worlds
never to be one...
and I cry for having to let go
when I so want to hold
hold so tightly
close to my heart…

Sunday, June 20, 2010

වසත් සිහිනය

මේඝ වැහි වළා මැද
හිරු මුවා වූ දිනෙක
කිළිපොලන සුළං රැළි
ගතම දැවටෙන දිනෙක
සතර අත මල් පිපෙන
වසත් සිහිනය දකිමි
ලදළු රැඳි තුරු සෙවන
මතකයෙන් සැරිසරමි

Saturday, June 19, 2010

පාළුව

නුඹ නැතිව සිත පතුල
විදුලිලන පාළුවට
හුරුවෙන්නේ කෙලෙසකද
කියාදෙනු මැන මෙමට
ජීවිතය පුරාවට
නුඹ නොසිටි බව ළඟක
අදහගනු නොහැක මට
වැරදුනේ කොහිද මඟ?...

Wednesday, June 16, 2010

දේදුනු

















මන්මත් කරන් පැහැ නෙක
එකට කැලතුණු දේදුනු
එකක් නොව දෙකක්ම!
පායලා අර ගගනත..

සිත් කඳුළු වැස්සේ
ලොව දකින රිවි හසරැල්
අතරමැද පෑයූ
දේදුනු සේයි නුඹ මට...

Thursday, June 10, 2010

වරම් නැති

දෑත අතරින් ගිලිහි
සුළං රැළි ලුහු බඳිමි
ඈත උයනක සුපිපි
මල් සුවඳ සිප ගනිමි
පියවි ලොව හැමතැනම
සිහින සිතුවම් දකිමි
හෙලන්නට වරම් නැති
කඳුළු බිඳුවක් හෙලමි

Monday, June 7, 2010

කිරිල්ලිය










ඉක්මණින් අඳුරු වෙන
මේ සීත සෘතුවේ
සිහින් තටු පුම්බගෙන
කවුළු දොර ලඟට වී
...කවුළුවේ උණුහුමට
පෙමින් බැඳි කිරිල්ලිය...!

Thursday, June 3, 2010

සසල ගීතය

නුඹේ ගෙල වට දෑත පටලා
නෙතඟ බැල්මෙහි සිරව සිටි'යුරු
පැටලිලා දැවටිලා සිත තුළ
සැබෑවත් සිහිනයත් මුහු වී

අප වටා හා අපව වෙන්කර
බැඳී ඇති මේ පවුරු පදනම්
නුඹේ උණුසුම් හුස්ම අබියස
වියැකුණා මුළු ලොවත් එක්කම

එකම හඬකින් රිද්ම නංවන
දෙහදකින් නැඟි සසල ගීතය
අපට පමණක් ඇසෙන මොහොතක
තවත් දැවටෙමි සිතින් නුඹ වෙත

සසර හුරු සුසුම

සිනා අහුරක් රැගෙන මඟ බලයි
කොපුල සිඹ කඳුළු බිඳු පිස දමයි
සෙනෙහසින් සිත ලඟම තනි රකියි
සසර හුරු සුසුම් රැල්ලක් දැනෙයි

Tuesday, June 1, 2010

කවි මල

හිස්ම හිස් වූ හිතෙන්
කවියක් උපදින්න
නුඹ දුන්නු හාදුව
නතරවී සිත ගැඹර
පීදුනා කවි මලක්!

Friday, May 28, 2010

කදෝපැණි එළිය

එකම එක මොහොතකට දුවඇවිත්
හිත කොනක හාදුවක් තවරාන
යළිත් ආ සැනින් මේ සැඟව යන
කදෝපැණි නුඹයි කළුවර සිතට..!

Saturday, May 22, 2010

එන්න මා හා...





















එන්න මා හා
දෑත පටලා
මේ පාළු මංපෙත
පියමනින්නට
ඇසක් නොගැටෙන
හඬක් නොඇසෙන
මෙමඟ දිගටම
සිනා අතුරමු
ඊයේ අද නැති
හෙටක් නුපදින
සොඳුරු ලොවකට
මෙයයි මාවත
සිතුම් එක්කර
සිහිනයේ ඉම
තැනූ ලොව වෙත
එන්න යමු අපි!

අපි

නොලැබුන ඊයෙත්
නොලැබෙන හෙටත්
අතරමැද ඉසිඹුවක
දින දින බැගින්
සිනා මල් අහුලන
අපි !!

Thursday, May 20, 2010

Rhythm of your heartbeat

I would love to feel your pulse
under my lips....
telling me the sure rhythm
of your heartbeat
...the rhythm
that sometimes feels
so close to my own…
just like my own…

Wednesday, May 19, 2010

උණුසුම

හාත්පස සීතල
දුරැර දැවටෙන
නුඹේ වදන්වල
උණුසුම!!

Sunday, May 16, 2010

නෙතු දිවෙන මානේ

මීදුම් සේල පටලා
උණුහුමට නිදන කඳු වැටි
හාත්පස හැමතැනම
නෙතු දිවෙන මානේ
සවන පාරන නිහඬ බව මයි
දෙනෙත රිදවන නිසල බව මයි
වළාකුල් සේම බරවූ
පාළු සිතකට දැනුනේ

Friday, May 14, 2010

මඟකදී ඇසුණු ගීය

සසලිත වැහි බිඳු අතර
නොනවතින රිය පෙළ මැද
තනිවූ මට...
ඇසුණු සඳ
ඔබ ලබැඳි ගීයක්
දැනුනි දුරක සිටියත්
උණුසුම්ම හාදුවක් !!

කවි නිමිත්ත!!

මසිත පැටලුණු
සහස් සිතිවිලි
අතර සෙව්වෙමි
කවි නිමිත්තක්..
නුඹේ හසරැල්
කතා, දඟකම්
විසිරිලා මේ
සිත පුරාවට..

නුඹයි මාගේ
කවි නිමිත්තම!!

Sunday, May 9, 2010

පැහැය !

කළු සුදු
දිවියට
පැහැය
එක් කළ
නුඹ!

Friday, May 7, 2010

....

නොලැබෙන දේ ගැන
නොවැටුණු කඳුළු
නොලියූ කවි
සිරවී සිතේ
නොසිතු ලෙස

කඳුළු මල්

නුඹ නොආ
මඟ දිගට
පිපී අර
කඳුළු මල්!!

Tuesday, May 4, 2010

!!...

දුකක් සිත තුල උපන් හැම විට
නුඹ ගැනම හිත හිතා උන් මට
නුඹ නිසා දුක හිතුනු දිනයක
මිරිඟුවක ඇති අරුම සිහිවිය

හේමන්තය















හීගෝතු නංවමින්
හේමන්තයක් ඇවිත්
තුරු විමන් පාළු වී
සුළං රුදු ලෙස සරත්
එකම එක ඉපල්ලක
කහ ගැහුණු පත් අහුර
යා යුතුවූ මං නොදැන
තනිවෙලා ඉකි බිඳිත්

Saturday, May 1, 2010

ඇසේවි...

සිතට උහුලනු නොහී
තනිකමක් දැනුනු විට...
ජිවිතයේ විඩාවෙන්
ගතම සසලිත දිනක...
අසනු මැන හෙමිහෙමින්
කනට කොඳුරන හඬක්...
හීනයක් අද්දරින්
මුමුණනා මුදු හඬක්...
මෙලොව කොයි තැනක හෝ
එකම එක හදක්වත්
උමතුවෙන් මෙන් සැලී
නුඹට පෙම් කළ බවක්...
නුඹ නිසා ලෝකයක්
එකලු වී ඇති බවක්...

Friday, April 30, 2010

නිල් නෙළුම

සිහිගිරි පාමුල
පිපි නිල් නෙළුම සේ
හැමදාම ඉන්නම්

දුර ඉඳන් දකිමි
ලං විය නොහැකි...

Wednesday, April 28, 2010

පහන් තරුව

අහඹු ලෙස පායා අවරගිර
නොනිවී නොසැලී දිලෙන
මටම පමණක් මඟ කියන
පහන් තරුවයි, නුඹ මට

නුඹ වෙතම දෑස දල්වා
නුඹ වෙත සිතම රඳවා
මඟ නොමඟ කිසිත් නොඅසා
පැතුමක් පතමි නුඹ ගැන

Friday, April 23, 2010

ළඟ සිටියානම්


අනෝරා වැසි මැද
වත සුසුමක් සතපන්න
අනේ නුඹ ළඟ සිටියානම් …
නොකියූ දහසක් රහස්
කනට කොඳුරා කියන්න
අනේ නුඹ ළඟ සිටියානම්…
විදුලිලන මන්දාරමේ
සීතලක් නොදැනෙන්න
අනේ නුඹ ළඟ සිටියානම්…
ලොව තැවුල් මගහැර
සිහිනයක කිමිදෙන්න
අනේ නුඹ ළඟ සිටියානම් …

Thursday, April 22, 2010

හීන?

හීන නොදකින නුඹත්
හීනම දකින මමත්
කෙසේද හමුවෙන්නේ
හීනෙන් වත්?

Wednesday, April 21, 2010

නොලැබූ

නොදොඩා වදනකුදු
ලියැවුන අකුරෙන්ම
සපැමිණ සීරුවෙන්
ලැගුම් ගෙන ම'හදේ
නොලබා බැල්මකුදු
සිතුම් සිය ගණනින්ම
පවසා දහක් දේ
ලැගුම් ගෙන ම'නෙතේ
නොලබා පහසකුදු
නොකියූ වදනින්ම
දවටලා සෙනෙහස
ලැගුම් ගෙන ම'සිතේ
නොලැබූ වරමක්ව
ජීවිතය පුරාවටම
කඳුළු බිඳුවක් වේවි
ලැගුම් ගෙන ම'ලොවේ 

Sunday, April 18, 2010

අරුම!!


සිත් පව්ව
මත පතිතව
මුල් ඇදූ
අරුම නුඹ!!

Friday, April 16, 2010

නුඹ

රැය පුරා ලඟ ඇසෙන
සෙත් කවිය හිත නිවන
හදේ බිය දුරු කරන
තුන් සුතුර රැව් නැඟෙන

Wednesday, April 14, 2010

මගේ තිළිණය


අකීකරු කෙස් රොදෙහි
ඇඟිලි තුඩු පටලන්න…
සිනාසෙන නෙතු යුගේ
ගැඹුරටම කිමිදෙන්න…
දඟකාර මුව මඬලේ
හාදුවක් සතපන්න…
පපුතුරෙහි හිස හොවා
හදවතට කන් දෙන්න…
අප අතර ඇති වෙනස
කල්පයක් සේ දුරයි
හිමි නොවන උණුසුමට
මුළු සිතම ලොල් බඳී
හැඟීමෙන් පිරුණු මේ
අකීකරු සිතුම් රැස
දහස් ගව් දුරක සිට
නුඹට දෙන තිළිණයයි

Monday, April 12, 2010

කඳුළු කැට

එක එක හේතුවට වැටෙන
එක එක හැඩේ කඳුළු කැට
ජීවිතය පුරාවටම...
 

Sunday, April 11, 2010

my little miracle





I remember the first time
I saw your little eyes...
staring straight into mine
As if u knew me
from the long journey
that we came together
with one beating heart

I remember the first time I held you
my darling little one
How I marveled at your perfectness
your round soft cheek
and the little curled toes

You are my miracle
my sweet little one
You made all things possible
You made all things certain
and with you I know
that the gift of life is sacred

Friday, April 9, 2010

කියනු මැන මට

සිතින් පමණක්
දෑත් පටලා
නොයුතු මාවත
පියමණින අප...
දෑත අතහැර
ම’හැර යන්නට
නුඹට සිතුනොත්
කියනු මැන මට
කිසිත් නොකියා
කිසිත් නොඅසා
නුඹට සමු දෙමි
නුඹේ ලොව වෙත
කඳුළු අහුරක්
දෑතේ ගුලි කර
සුසුම් රැල්ලක්
හදේ සිර කර
සිහිනෙකින් ගෑ
සඳුන් සුවඳක්
හදේ තවරා
නික්ම යන්නෙමි

Thursday, April 8, 2010

නොකියූ කව

මට දැනෙන තරමට
නුඹට නොදැනෙන බව
දනිමි මම
මා කියන තරමටම
නුඹට නොකියවෙන බව
දනිමි මම
නොදැනු දේ නොකියන්න
නුඹ පරෙස්සම් බව
දනිමි මම
නොදැනුනත්
නොකිව්වත්
නුඹේ එක සිනහවක්
අගෙයි මට

Wednesday, April 7, 2010

almost

I can almost hear you
your soft crooning voice
and the strum of the guitar...
I can almost see you
your head bent
hair falling over your eyes...
I can almost touch you
you seem so close
so within reach
almost....
almost....
But not quite..

Tuesday, April 6, 2010

එදා - අද

එදා
ආදරෙන්
නුඹේ අත
පැළඳූ රන් මුදුව
අද
පුපුරු ගසන සලකුණකි
මා කොපුල මත
 

Saturday, April 3, 2010

සුළඟ

නොඅසාම නොකියාම
හද තුළට පාව ආ
කිසි දාක හමු නොවූ
හුරුපුරුදු සුළං පොද...
සිනා දෝතක් ගෙනත්
සිත ළඟම සතපවා
හදේ රැඳි කඳුළු කැට
එකින් එක පිස දමා
ලොවම අමතක කරන
සුභ සිහින දවටනා
හිතමිතුරු සුළං පොද...
නොඅසාම නොකියාම
සුළං රැල්ලක් ලෙසම
යන්න නම් එපා යළි
ලෝකයම හිස් වේවි!

Thursday, April 1, 2010

ඇරඹුම

සුන් වූ පැතුම් ළඟ
පැරදුනු විට ... ජීවිතය
හිරු මඬල ද ගිනිගෙන
අහක බැලුවා මතකයි
එහෙත්... නුඹ
ගිනිගත් ලොවක් මැද
කොහෙන්දෝ පාර අහගෙන
හීන් පවනැල්ලක් වී
මගේ ලඟ දැවටුනා
නුඹේ සිනා සිරිපොද ළඟ
මතකයට විසිකළ පැතුමන්
ලදල්ලක් සේ පීදී
සිත අග යළිත් ඉපදුනා...
ඉතින් හෙට දවසේත්
යළිත් අතුපතර විහිදන්න
හිරු මඬල හා හිනැහෙන්න
නුඹෙන් දිරි ලද්දෙමි

Tuesday, March 23, 2010

කවිය

පාලමකි යා කරන
ඊයෙත් අදත්
කඳුලත් සිනහවත්
අඳුරත් එළියත්
නුඹත් මමත්!!

Sunday, March 21, 2010

නින්ද


නින්ද
දරු පැටව් නැති දා අගය නැති...
දරු පැටව් ඇති දා ලැබෙන්නේ නැති...

Friday, March 19, 2010

කඳුළු පින්කම

පුන් පෝ දින නුබ
රජ වෙයි ගනඳුර
පාළු දැනී සඳ
වෙහෙරේ ගසයි හිස
නාමල් පිපුනිද
සුවඳක් කොහි වෙද
රොන් සුණු මුවරද
සියතින් පෙති සිඳ
බෝ මැඬ පහනෙන්
විහිදෙයි අඳුරම
කඳුළු දියෙන් එය
දැල්වූ නිසාවද?
බුදු සමිඳුන් ළඟ
පා පියුමන් වැඳ
ගිනිගත් සිතකට
දියක් යදිමි මම

Wednesday, March 17, 2010

නුඹ

මේඝයක් සේ පාවෙලා විත්
සිරිපොදක් සේ විසිරිලා
වියළි කර්කශ පොළෝගැබ වෙත
නැවුම් සිසිලක් පැතිරුවා


සඳ රැසක් සේ පාවෙලා විත්
කොඳ කැකුළු පෙළ පුබුදලා
රැයේ ගණඳුර දුරැර රහසින්
සහන් එළියක් විහිදුවා


සුපැතුමක් සේ පාවෙලා විත්
කඳුලු අතරින් හිනැහිලා
ජීවිතේ ඉම සොයා යන්නට
අත්වැලක් වී නැවතුනා

Tuesday, March 16, 2010

කවි සිතට

කඳුළු කැට නිරතුරුව
දෑස් ළඟ නතර වුන
අතීතයේ කොයිතරම්
මිතුරුවීද කවිකම්...


නෙක සිහින සැබෑ වුන
සිනා තොල් අග පිපෙන
අද ඇයිද කවි සිතම
නිරුද කතරක් වුනේ?


මම සොයන කෙම් බිමත්
ඉසිඹුවත්, කවිසිතත්,
බලාඉමි එනතුරා
සිහිනයක් වෙලාවත්..