Tuesday, May 31, 2011

වැළපෙනා විලෝ තුර




















තණබිමට ඉහිරිලා
දුර ඉඳන් හඳ එළිය
වැළපෙනා විලෝ තුර
පාමුලය තරු කැකුළ...
හිස්ම හිස් හිතක් ගෙන
ඇවිදයමි අඳුර මැද
මුළු ලොවට රහසින්ම
වළලන්න කඳුළු නෙත...
රළු පරළු මුල් අතර
මතක යවුලෙන්ම කැණ
විලෝ තුර පාමුලෙහි
වළලා යමි මගේ දුක..
ඉතින් මේ මොහොත සිට
වැළපෙනා විලෝ තුර
තව තවත් හඬන්නට
නුඹට හේතුවක් ඇත

Sunday, May 22, 2011

රුව

ඉඳහිටක ගොඩවෙමි
මතකයේ ගබඩාව වෙත
අගුළු ලූ ද්වාර පසුකර
එළඹෙමි රහස් කුටියට

හිස මඳක් ඇලකර
දෙනෙත පුරවා මඳහස
ඈතක බැල්ම යොමුකළ
නුඹේ රුවක් සඟවා ඇත

මොහොතකට ගෙන දෑතට
යළිත් කටපාඩම් කර
තිබූ තැන්හිම සඟවා
අගුළු ලා නික්මෙමි මම

Friday, May 20, 2011

නැතිවූ

වළාකුළු හැම එක
පෙරළලා මුළු අහසේම
නැතිවුන හාදු අහුරක්
සොයනවා ඉර දවසෙම...

Tuesday, May 17, 2011

my four seasons

සියලු පත් අතහැර
තුරු පෙළ හඬන මොහොතක
සුළඟද මිදී ගල්වුණ
සිසිරයේ ඉම දවසක
හද මැදම, උණුසුම්
කුටියක්‌ තනා රහසේම
නුඹ ඇවිත් තිබුණා
එන යන බවක් නොකියාම!

කහ මලින් පලසක්
තණබිම එලන දවසක
සැඩ හිරුට නතුවී
මුළු ලොව දැවෙන හවසක
සිත ළඟම, සිසිලස
පහසක් වෙලා රහසේම
නුඹ ඇවිත් තිබුණා
නවතින බවක් නොකියාම!

Sunday, May 15, 2011

පවනැල්ලක් වෙමි

ගිනිගත් නුවරක
දහසක් කලබල
මැද එක මොහොතක
පවනැල්ලක් වෙමි

නොසිතුව විටකදි
සියොළඟ දැවටී
සිතුවිලි කළඹා
සැණෙකින් සැඟවෙමි

Saturday, May 14, 2011

පිරියම්

කඩතොළු වූ ම'හිත ළඟ
නතර වී සෙනෙහසින්
රිදුනු තැන් පිරිමැදන්
මටසිලිටු කරන නුඹ

පුංචි හසරැළි බිඳක්
දිදුලනා මතකයක්
අතුරලා බෝ පෙමින්
හිස්තැනක් වසන නුඹ

සුව වුවත් ඇදුම්කන
අතීතෙක කැළැල් මත
නුඹේ සුවඳ තවරලා
සිනහ දී, දුරක නුඹ..!

Tuesday, May 10, 2011

නම් නැති, නිම් නැති

කොපුලත දැවටෙන
සුසුමකි ඔබ මට
දෑසට නොපෙනෙන
හදවත කළඹන

නම් නැති නිම් නැති
කවියකි ඔබ මට
ඇරඹුම නොදැනුන
සිත තුළ නැවතුන

Friday, May 6, 2011

පසුවදන

කැඩපත බිඳුණු පසු
දුටිමි එහි
මගේ පිළිඹිබු
දෙකක්!

Wednesday, May 4, 2011

හංගන











මෙහෙම්මම, මේ විදිහට
හිරු එළිය ඉරි වැටෙනවිට
නුඹටත් දුකක් දැනෙනවද
මොහොතක් හුස්ම හිරකර?

Monday, May 2, 2011

විරල

නුඹ මගෙන් දුරක බව
සාක්කි ය මේ අහස
හැඬුම්බර වී නිතර
වළා අහුරයි දසත
රහසින්ම කියන්නම්
පලක් නැහැ හඬා නම්
දේදුන්න මැවෙන්නේ
හැමදාකමත් නොවේ